You are currently browsing the monthly archive for August 2009.


ဘာမှအထူးအထွေမရှိဘူး

သူ့မျက်ဝန်းလေး သတိရမိရုံနဲ့

ကောင်းကင်ယံက ညို့တက်လာသောမိုးသားများကို ကြည့်ကာ

တစ်ပါးသူရေးဖွဲ့ခဲ့တဲ့ စာသားလေးလို

ပြိုမှာလေလားလို့

ပိုက်ထားတဲ့လက်ကလေးကို နေရာပြောင်းမိ

ဒီကိစ္စဟာ တအားနူးညံ့တယ်။    ။

ခင်ဇော်မြင့်

ဆရာခင်ဇော်မြင့်ရဲ့ လွန်ခဲ့တဲ့ ငါးနှစ်လောက်က ဖတ်ခဲ့ရတဲ့ ကဗျာပါ။ မှတ်ဥာဏ်ထဲမှာ ကျန်နေသေးလို့ တင်လိုက်တာပါ။ ဖော်ပြခဲ့တဲ့ magazine နဲ့ ခုနှစ်ကတော့ မမှတ်မိတော့ပါဘူး။

အဝေးဆီကို ငေးမျှော်ကြည့်လိုက်ရင် မြူခိုးတွေ။ အ၀ိဇ္ဖာလို ဘာကိုမှမမြင်နိုင်လောက် အောင် မှုန်မှိုင်းလို့။ ပင်လယ်ရေပြင်မျက်နှာပြင်ထက်ပေ(၄၀၀၀)ကျော်မြင့်တဲ့ ဒေသဆိုတော့ တိုက်ခတ်နေတဲ့လေပြည်ဟာအသက်မဲ့အေးစက်လို့။ တောင်ပေါ်လမ်းကျဉ်းလေးတွေဟာ မိုးမြူတွေထဲတိတ်ဆိတ်ပျောက်ကွယ်နေကြတယ်။ နေ့တွေ၊နေ့တွေဟာတစ်စွန်းတစ်စနေရောင်ကိုမမြင်ရဘဲ တငွေ့ငွေ့ကုန်ဆုံးနေကြတယ်။ ရေပွင့်ရေပေါက်တွေ စွတ်စိုလေးလံနေတဲ့သစ်မြစိမ်း ရွက်တွေ၊မြူတွေကြားမှာ ပျင်းရိမြုပ်နစ်နေတဲ့အဖြူရောင်သစ်ပင်တွေ၊ အေးရှစိမ့်မြတဲ့ ရာသီဥတုနဲ့ဝေးကွာခြင်းရဲ့ပူလောင်ပြင်းပြသော မီးလျှံတွေ။ ပြောကြစတမ်းဆိုရင်နေ့စဉ်ရှုခင်းဟာ ထူးခြား ပြောင်းလဲမှုသိပ်မရှိလှဘူး။ ထပ်ပြန်ကလဲလဲမက်နေရတဲ့ဆောင်းတွင်းအိပ်မက်တစ်ခုလို အရာရာ ဟာ ခေါက်ရိုးကျိုးလို့။အသားကျနသေသပ်လို့။

တစ်ခါတလေ နေရောင်ကို တမ်းတမ်းတတမျှော်လင့်မိတယ်။ နွေးထွေးနူးညံ့တဲ့နေရောင် ခြည်နဲ့ မြို့ပြရဲ့ပလက်ဖောင်းတစ်ခုပေါ်မှာလမ်းလျှောက်လွတ်လပ်ချင်မိတယ်။ တကယ်ဆို မျှော် လင့်ချက်ဟာမျှော်လင့်ချက်ဘဲလား။ တကယ်ဖြစ်မလာနိုင်တဲ့ တစ်စုံတစ်ရာကိုမျှော်လင့်မိုက်မဲ နေမိတာလား။ အတွေးကိုရောက်တဲ့နေရာမှာရပ်တန့်လိုက်ချင်တယ်။ လျှောက်နေတဲ့လမ်းဟာ တစ်နေရာရာမှာရပ်တန့်ပြီးဆုံးသွားသလိုမျိုး အရာရာကို မေ့ပျောက်လိုက်ချင်တယ်။ မနက်ဖြန်နေသာမှာလား။ တိမ်ကင်းစင်တဲ့ ကောင်းကင်ကို ခဏဖြစ်ဖြစ်မော့ကြည့်ခွင့်ရမှာလား။ ရာသီဥတု လင်းမြကြည်လင်နေတဲ့ရှားရှားပါးပါးနေ့မျိုးဆိုရင်တော့ အဝေးရှုခင်းတွေကို ငေးရီလှမ်းမြင်ခွင့်ရတယ်။ ဟိုးအဝေးမှာ ညီညာပြန့်ပြူးတဲ့ မြေပြန့်လွင်ပြင် . . .မြူခိုးရိပ်ရိပ်ပြာပြာနောက်ခံနဲ့။ အဲဒီ မြေပြန့်လွင်ပြင်ရဲ့ ဒီဘက်မှာတောင်ခိုးအထပ်ထပ်နဲ့ တောင်စဉ်တန်းတွေ။ တောင်ခိုးနဲ့တိမ်ဟာထိစပ်ယှက်လိမ့်လို့။ မောပန်းတယ်။ နာကျင်မိတယ်။ လည်ချောင်းတွေကွဲအက်သွားတဲ့အထိ အော်ဟစ်လွတ်လပ်လိုက်ချင်တယ်။ ငါ့အသံဟာတောင်တန်းတွေရှိရာ ပဲ့တင်ပြန်လာနိုင်ပါ့မ လား။

လူအဖြစ်မှာ တတ်နိုင်သမျှ အရာရာကို မေ့လျော့ထားခဲ့တယ်။ တက်နိုင်သမျှမြွေတစ် ကောင်လို တိတ်ဆိတ်ယဉ်ကျေးစွာ ရစ်ခွေရှင်သန်နေခဲ့တယ်။ တစ်ခါတလေသူငယ်ချင်းတွေနဲ့ ဆူညံအော်ဟစ်လို့ တစ်ခါတလေ အခန်းရဲ့ထောင့်ကျဉ်းတစ်ခုမှာတစ်ယောက်တည်း မွန်းကျပ် နာကျင်လို့။ အဲဒီလိုအချိန်မျိုးမှာဘယ်သူနဲ့မှလည်း စကားမပြောချင်။ ဘယ်လိုလူမှုဆက်ဆံရေး မျိုးနဲ့မှလည်းအလိုက်အထိုက်မနေချင်။ အဲဒီလိုအချိန်မျိုးမှာဆိုရင် မွန်းကျပ်ပိတ်မိနေတဲ့လိပ်ပြာ တစ်ကောင်ရဲ့ နိမိတ်ပုံကိုသာသွေးရူးသွေးတန်းခံစားမြင်ယောင်နေမိတာ။ လိပ်ပြာဟာ အခန်းရဲ့ နေရာအနှံ့မွန်းကျပ်ပျံသန်းနေခဲ့တာ။ သူ့မှာ ထွက်ပေါက်မရှိ။ စေးထန်းလေးလံလို့။မွန်းကျပ် ပိတ်ဆို့လို့။ အခန်းရဲ့ လေးဖက်လေးတန် နံရံတွေကိုသူ့တောင်ပံနုနုလေးနဲ့ တဖျန်းဖျန်းကွဲ အောင် ရိုက်ခတ်ပျံသန်းနေခဲ့တာ။တကယ်ဆို လူအဖြစ်ဆိုတာ ရေပွက်ပမာလား။ နေ့ရှိသရွေ့ ခေါ်ဆိုနေတဲ့တယ်လီဖုန်းတွေဟာ ဆက်သ်ွယမှုဧရိယာပြင်ပလား။အခန်းရဲ့ပြတင်းတံခါးကို ပိတ်ထားတယ်။ ပြတင်းတံခါးကိုဖွင့်လိုက်ရင်မြူငွေ့တွေ အဆုပ် လိုက် အမြွှာလိုက် လွင့်စင်လာတာပဲ။ အခန်းဟာခဏချင်းစွတ်စိုထိုင်းမှိုင်းသွားတာပဲ။ တောင်ကြောတစ်လျှောက်လူသွားလမ်းကျဉ်းကျဉ်းလေးတွေမှာ လျှောက်ရတဲ့အခါ စိုထိုင်းစ များပြားတဲ့လေပြည်မှာ ဆံပင်တွေခဏချင်းပဲ စိုရွှဲစေးကပ်သွားလေ့ရှိတယ။မြူဝတ်မြူခိုးတွေကြားမှာ အရာရာဟာ အဖြူအမည်းရုပ်ရှင်လို။တကယ့်အဖြစ်အပျက်လား အိပ်မက်လား၊ေ၀၀ါးချင်ချင် ဖြစ်ရတာ။ တစ်ခါတလေရောက်တတ်ရာရာတွေးမိ၊ စိတ်အချဉ်ပေါက်ရွဲ့စောင်းမိတယ်။ ဒီလို နေရာမျိုးမှာဆယ်စုနှစ်တစ်နှစ်လောက်သာနေရမယ်ဆိုရင် အလိုအပ်ဆုံးအရာဟာ မီးလင်းဖိုတစ်ခုထက်စာရင် မိန်းမတစ်ယောက်ဖြစ်မှာပဲ။ အနုပညာဆီမပါ ပြားမပါကဗျာစမ်းသပ်မှုတစ်ခု ထက်စာရင် အရက်ပြင်းပြင်းတစ်ခွက်က ပိုအဆင်ပြေမှာပဲ။

နေ့ရှိသရွေ့ ကဗျာတွေအများကြီး တွေးဖြစ်၊ရေးဖြစ်တယ်။ နေ့ရှိသရွေ့ အာရုံကိုအနု ပညာမှော်ရုံဆီမှာ ကူးလူးချိတ်ဆက်ထားတယ်။ တကယ်ဆို လူအဖြစ်ကတစ်နေရာ၊စိတ်ကူး စိတ် သန်းကတစ်နေရာမှာ။ကဗျာအကြောင်းတွေးလိုက်၊သူငယ်ချင်းကဗျာဆရာကဆီက စာကိုမျှော် လိုက်၊တွေ့တွေ့သမျှ စာအုပ်တွေကို ဆွဲဖက်လိုက်နဲ့ နေ့တွေအချိန်တွေ၊ကုန်ဆုံးနေရတာ။ တကယ်ဆို ကဗျာအနုပညာဟာ ဒီဘ၀အတွက် အခြားသော ကမ္ဘာလား။ရောက်ရှိမလာသေးတဲ့ မနက်ဖြန်ပေါင်းများစွာအတွက်စိမ်းလန်းသောမီး၊စိမ်းလန်းသော တေးသံလား။

ဟော . . . မိုးက ရုတ်တရက်ရွာလာပြီ။ မြင်ကွင်းမှာ မိုးစက်မိုးပေါက်တွေကရုပ်ချည်းနေရာ ယူခဲ့ပြီ။ မိုးရေစ်တွေဟာ မိုးနဲပအတူပါလာတဲ့လေမှာယိမ်းနွဲ့လွင့်ပါလို့။ ခေါင်မိုးပေါ်ရေကျနေတဲ့ အသံက တဗြုန်းဗြုန်း .. .တဗျင်းဗျင်းနဲ့။ မိုးရွာထဲကို တစ်ဟုန်ထိုးပြေးထွက်သွားလိုက်ရင် ကောင်းမလား။ ငယ်ငယ်တုန်းကလု . . .။ လွတ်လပ်ပေါ့ပါးစွာနဲ့။ဝတ်ထားတဲ့အ၀တ်အစားတွေအားလုံး မိုးရေထဲမှာ ရွှဲရွှဲစိုကုန်မှာပဲ။ဆံပင်တွေကတဆင့် မျက်နှာပေါ်စီးကျလာတဲ့ မိုးစက်မိုးပေါက်တွေ ဟာအေးမြလန်းဆန်းနေမှာပဲ။ မိုးကြောင့် မျက်လုံးထဲကမြင်ကွင်းဟာရုပ်ချည်းပြောင်းလဲသွားခဲ့ ပြီ။လျှပ်စီးလျှပ်ရောင်တ၀င်းဝင်းနဲ့ . . .။ သိပ်သည်းပြင်းထန်တဲ့မိုးဟာအရာရာကို ၀ိုးတ၀ါးကမ္ဘာ ထဲဆွဲခေါ်လို့။ ဒီဒေသရဲ့ ရာသီဥတုကတအားအပြောင်းအလဲမြန်တာပဲ။ ခဏချင်းပဲ ရာသီဥတု ကြည်လင်လိုက်၊ခဏချင်းပဲမြူခိုးတွေနဲ့ေ၀၀ါးသွားလိုက်၊ခဏချင်းပဲ မိုးပွင့်မိုးစက်တွေ ပိတ်ဆို့ပြို ဆင်းလာလိုက်နဲပ။ စိတ်အပြောင်းအလဲမြန်တဲ့မိန်းမတစ်ယောက်လို၊အချိန်ခန့်မှန်းဖို့ရာ ခက်ခဲ လွန်းတဲ့နာရီပျက်တစ်လုံးလို။ ရွာနေတဲ့မိုးမှာ ရေစီးကြောင်းငယ်တွေ ခွဲဖြာစီးဆင်းလို့။ ရေစီး ကြောင်းတွေဟာကံကြမ္မာလို မြင့်ရာကနေ နိမ့်ရာကိုစီးဝင်လို့။ပတ်ဝန်းကျင်မှာ အအေးဓါတ်က ပိုမိုသိသာလွန်ကဲလာခဲ့ပြီ။ဘယ်ဆီဘယ်ဝယ်မျှော်မှန်း တမ်းတဖို့ရာ ရှစ်ရပ်ခွင်ဟာ မှုန်မှိုင်းရီဝေလို့။အထီးကျန်စိတ်ဟာ မမြင်ရတဲ့ မကောင်းဆိုးဝါး တစ်ကောင်လိုအတွေးကိုစီးဝင်ပူးကပ်လို့။ မမြင်ရတဲ့နံရံတွေကို အာရုံမှာခံစားသိ၊သိနေမိတယ်။ ဒီလိုအချိန် ရေဒီယိုခလုတ်ဆွဲဖွင့်လိုက်ရင်နည်းနည်းဖြစ်ဖြစ် စိတ်သက်သာရာ ရမလား။ ဒီလို အချိန်ကိုယ့်ကိုကိုယ့်ဂီတသံတစ်ခုထဲမှာ ဆွဲနှစ်လိုက်ရင် မာတင်းနေတဲ့အာရုံကြောတွေဟာပျော့ပျောင်းသွားလေမလား။အဲဒီစိတ်ကူးစိတ်သန်းတိုင်းဟာ တွေဝေလို့၊ဒွိဟဖြစ်လို့၊အရာရာဟာ မှုန်မှိုင်းနာကျင်လို့ . ..။ နေ့တွေ။ ။

ဘုန်းနေသွန်း
idea magazine; 2009 ,july
အောင်ပိုင်စိုးဆီက စာက်ိုမျှော်ရင်း ကုန်ဆုံးခဲ့ရတဲ့ နေ့တွေအကြောင်းပါ။ နေရောင်ကို တစ်ရက်မှမမြင်ခဲ့ရတာ ဒီတစ်ခါက ပထမဆုံးပါပဲ။ နောက်ဆုံးလည်းဖြစ်ပါစေလို့ဆုတောင်းပါတယ်။


ချစ်မိပြီဆိုတာနဲ့

လွမ်းရတော့တာပဲ။

ငါက ချစ်ခြင်းမှာ ဖျတ်ဖျတ်လူးရမယ့်အရွယ်လား

လေပြေညင်းလေးပွတ်တိုက်ရုံနဲ့

ပြုတ်ထွက်သွားရတော့မယ့် ခရေပွင့်လေးရဲ့အညှာ

ငါ့မေတ္တာကို ကောင်ယူမွေးစားလှည့်ပါ ။

စာချုပ်စာတမ်းတွေမလို

ကလေးလေးတစ်ယောက်စုဗူးဖောက်သလို

နင်ကြည်ကြည်နူးနူးရေတွက်မယ့် မုန့်ဖိုးလေးသာ

ငါဖြစ်ချင်တယ်။

ညီမလေးရယ်

ငါ့ရဲ့ကြည်နူးလေးစားခြင်းဆိုတာ

ညအမှောင်မှာ

ပြတင်းတံခါးပေါက် ကျရောက်အလင်း

ဝင်းကနဲပြိုးပြက် ငါ့ရင်တစ်ဆောင်လုံး အသက်ဓာတ်

လည်ပတ်နေတဲ့သွေးများကိုပူနွေးစေတဲ့

ညီမလေးရဲ့ သုံးလုံးသောနာမည်လည်းဖြစ်တယ်။

ငါ့ရဲ့စွဲလမ်းခြင်းဆိုတာ

ပင့်သက်လှိုက်လှိုက် အကြည့်တစ်ရှိုက်စာဟင်းလင်း

ရှုခင်းတစ်ဝက်မှာ

သိမ်သိမ်မွေ့မွေ့လေးဝှက်ထားခဲ့တဲ့

ညီမလေးရဲ့ မျက်ဝန်းနက်တစ်စုံလည်းဖြစ်တယ်။

ငါ့ရဲ့ ကြင်နာယုယခြင်းဆိုတာ

သနပ်ခါးရေကျဲ အသည်းနစ်မွှေးမြ

သင်္ကေတအဖြူ မထူမပါး

ညီမလေး ညာဘက်ပါးပေါ်က

အမာရွတ်လှလှလေးလည်းဖြစ်တယ်။

ငါ့ရဲ့နှောင်တွယ်မြတ်နိုးခြင်းဆိုတာ

လအစင်းစင်းအလင်းကြွေသက် ၀ပ်တွားအပ်သော

နတ်တို့ဖန်ဆင်း နက်မှောင်သောအလင်းလည်းရှိအပ်သော

ဆွတ်ပျံ့ရီရီ ပုခုံးနုဆီဝဲကျ

ညီမလေးရဲ့ပျော့ပျောင်းတဲ့ဆံနွယ်စလေးတွေလည်းဖြစ်ရဲ့။

ထိုမျှမက

ညီမလေးအရယ် ညီမလေးအပြုံး

နှလုံးသားဆီ ဖုန်းမြည်ခဲ့တဲ့

ညီမလေးရဲ့အသံနုနု

နှစ်ခုသောမေးစေ့ဝိုင်းလေးနှင့်တကွ

ဆွတ်ဆွတ်ဖြူလှပ စိတ်နေစိတ်ထား

ညီမလေးနဲ့ပတ်သက်သမျှအရာအားလုံးလည်းဖြစ်တယ်။

ညီမလေးရယ်

ငါကပြဿဒါးမှာမွေးဖွားတဲ့သစ်ပင်

ငါ့အပွင့်က ဝေဒနာနဲ့ချင်းချင်းနီတယ်။

ငါသီဆိုရတဲ့ လောကဓံတေးက သွေးသံရဲရဲ

နင်နားမထောင်ဝံ့မှာလည်း စိုးတယ်။

ရှင်းရှင်းပြောရရင်  ငါကဆင်းရဲတွင်းနက်တယ်

ငါ့အသက်ရှင်တင်ဆက်မှုမှာ

ငါ့ဆုတောင်းများသာ နင့်အတွက်စောင့်ရှောက်စရာဖြစ်တယ်

ငါ့အချစ်တစ်ခုသာ

နင့်အပေါ်မှာငါမိုးပေးနိုင်တဲ့ထီး

နင်စီးရမယ့်ဖိနပ်

ညီမလေးသက်ဝင်တဲ့

စိတ်ကူးယဉ်အနာဂတ်မှာ

ငါကတဖြည်းဖြည်း မှုန်းဝါးပျောက်ပျက်ရမယ့်အရာပါ။

သို့ပေမယ့်လေ. . .

နင့်အပေါ် ချစ်မိခြင်းတစ်ခုသာ

မျှော်လင့်ချက်မပါတဲ့ ငြိမ်းချမ်းရေး

သွေးသား အဓိပ္ပါယ်

နင့်မေတ္တာတရားသာ

ငါရှာဖွေတဲ့ ဘ၀အဘိဓမ္မာ

ရဲရင့်သန်မာတဲ့ ဆုံးဖြတ်ချက်

ငါရှေ့ဆက်မယ့်အနာဂတ်ရဲ့အားလည်းဖြစ်တယ်။

နင်သာ ငါ့အနုပညာ ငါ့ကဗျာ

ငါ့ရင်ခုန်သံစစ်စစ်

ငါ့အချစ်ထံအလင်းပြန်တဲ့ ကြေးမုံတစ်ချပ်

ငါ့ဘ၀ဆီပဲ့တင်ထပ်တဲ့ ငါ့အသက်ရှူသံလည်းဖြစ်တယ်။

ငါလေ. . .

နင့်ကိုချစ်တဲ့စိတ်နဲ့သေရမယ်ဆိုရင်လည်း

ငါ့ထွက်သက်ဟာ

ညင်သာလွန်းမက နူးညံ့လှပနေမှာ။

ညီမလေးရေ. . .

ငါ့ဆုတောင်းခြင်းမှာ

နင့်မနက်ခင်းတွေ ငြိမ်းချမ်းမွန်မြတ်ပါစေ

မနက်ဖြန်ညီမလေးလှမ်းမယ့် ခြေလှမ်းတိုင်းမှာ

တန်ဖိုးအသိန်းအသန်းမက ရဲရင့်လှပပါစေ

မနက်ဖြန် ညီမလေးဆိုမယ့်သီချင်းမှာ

ကံကောင်းခြင်းကိုသာ မွေးဖွားသန့်စင်ပါစေ. . .

တကယ်ဆိုရင်

မမြင်ဖူးလို့ မူးခဲ့ရတဲ့မြစ်ကလေးတစ်စင်းပါ

ချစ်မိခြင်းကြောင့် ဖြစ်ရတဲ့ အပြစ်တွေရှိရင်လည်း

ချစ်မိခြင်းကြောင့်သာလျှင် ကျေပါစေတော့

ညီမလေးရယ် ။        ။

မင်းစိုးရာ

၅.၆.၂၀၀၄

သရဖူမဂ္ဂဇင်း၊ ဖေဖော်ဝါရီ၊၂၀၀၅။


ခဲရာခဲဆစ်

စိတ်ကူးတွေခိုးခိုးကြည့်ရုံနဲ့

ကိုယ်သင်းနံ့လေး အဆုတ်ထဲဝင်ဆောင့်တယ်။

စိတ္တဇဆန်တဲ့ အိပ်မက်တွေလေ…

ပြန်တွေးကြည့်တော့

လရောင်နဲ့ဖွဲ့တဲ့ အိပ်မက်ညလေးမလွင့်တလွင့်

မေတ္တာနဲ့ရုန်းတဲ့ ဆံနွယ်ထုံးလေးကပို့ကရို

တူနှစ်ကိုယ် သီကုံးယှက်သွယ်ရာသီပေါ်

မျက်ဝန်းဝိုင်းလေး ရွှန်းစိုကော့ပျံ

နှုတ်ခမ်းပါးလေး တိမ်းညွှတ်အိရွ

နှလုံးသွေးများ လျှပ်စီးလှိုင်းကြွ

အနမ်းရိုင်းတွေ တောထလို့။

ညီမလေးဖြူပြာပြာရေ…

ပိုပိုပြီး သတိရလေ

သစ္စာတရားဟာ ပိုအရောင်တောက်လေပေါ့။

သုံးလေးငါးနှစ်

မဖုံးနိုင် မဖိနိုင်အောင်ပဲ

တမျှော်တခေါ်အလွမ်းတွေထဲ

တစ်နယ်တစ်ကျေးပန်းပွင့်လေး

ပွင့်ဖတ်တွေ စိမ်းလို့။    ။

နောင်မင်းအေး



လရောင်ကို မျက်ဝန်းနဲ့သပ်အတင်မှာ

ယဉ်တစ်ကိုယ် သူ့ဆံနွယ်လေးမြင်ရတယ်

တယောကလေးလို

သူ့အတွေးမှာ ကိုယ်ဟာငေးရီလို့

သူ,မညိုခင် ကိုယ့်စိတ္တဇလေးအရင်ရွာနေဟန်

တံလျှပ်လို

လေမှာထင်နေ ကိုယ်သင်းရနံ့လေး အသံပေးတယ်

လှတစ်မျက်နှာ သူ့အပြုံးလေး ကိုယ်ထင်ပြတယ်

သွေးကြောနုစိမ်း ကြယ်ကလေး

သူ့…

အဖွဲ့အနွဲ့ဗလာ

ဘယ်လိုရတနာဆင်မြန်းမထားရာ လည်တိုင်လေး

ပတ္တမြားသွေး သူ့နှုတ်ခမ်းတော်ရဲရဲအနီ

ဘယ်ပန်းချီမှာ သူ့အလှရွှေလွှာသီရမယ်

ဘယ်ကဗျာမှာ သူ့အလှစာမပီရမယ်

ပြစ်မျိုးမျှမထင်

ကိုယ်နေဟန်ကျော့ကျော့ဝင်းပရာ

ပါးထက်က

စံပါယ်တင်မှဲ့လေး သူ့ဒဏ္ဍာရီ။   ။

ဘုန်းနေသွန်း

ရတီမဂ္ဂဇင်း ၊ ၂၀၀၇


တိုးတိုးဖွဖွလေး ဖြတ်တိုက်သွားရုံနဲ့

နှလုံးသားလေး လှုပ်ရှားယိမ်းယိုင်

အချစ်ဦးမြားလေး

ဒီရင်ထဲ စိုက်ဝင်နေတာ ဘယ်လောက်ကြာပြီလဲ

ကြည့်…

ဟောဟို ဖုန်းကြိုးတစ်လျှောက်မှာ

စိတ်တစ်ကမ်းစာ အလွမ်းသံလေးအဖေါ်မဲ့စွာ

ငြိလို့…

ငါက အကျအပေါက်များများနဲ့ပဲ ပန်းကောက်ချင်ခဲ့သူ

နင်က

ပန်းပျံပင်ဆင့် အလှပွင့်တဲ့သူပဲ

ကံဇာတာအလိုအရ

ချစ်ကံခေအပြုံးများနဲ့ စွယ်တော်တစ်ခြမ်း

လရောင်စိုအိပ်မက်ညလေး သီးပွင့်ခဲ့ရာ

ဒီလို တိတ်တိတ်ခိုးခိုးချစ်ရတာကိုက အရသာပါ

ကဲ…. သိမ့်သိမ့်ကလေးစီးပြီး

ငြိမ့်ငြိမ့်ကလေးတိုက်စားခဲ့သူ

(ဖြူပြာပြာ) လေညင်းလေးရေ

ငါ…

ရိုးမြေကျသစ်တစ်ပင် စိုက်ပျိုးခဲ့ပါတယ်။       ။

နောင်မင်းအေး

နှလုံးအိမ်မဂ္ဂဇင်း ၊ ၂၀၀၅

ကြယ်တွေကို

ငေးမောရင်း မင်းသတင်းလေးမေးမိတယ်

အိပ်မက်မှာ မင်းဆံနွယ်တွေ ရေလိုမျောလို့

သံသရာမှာ မင်းရယ်သံလေး ကမ်းလိုတင်လို့

မင်းဟာ

ဆယ်ကျော်သက်အရွယ် လရောင်

ဆံပင်ရှည်နဲ့ အလှဖွဲ့ကဗျာ

ဖွင့်ပြောဖို့ရာ

မင့်တောင်စွယ်မှာ ငါဟာနေကွယ်လို့

ငါ့အချစ်ကို သိမ်းထားတယ်

မင်းမသိအောင်

သစ္စာတရားကို ရင်မှာဓားလိုစိုက်ထားတယ်

မိဆိုး။       ။

ဘုန်းနေသွန်း

Idea Magazine ၊ ၂၀၀၉

ပြက္ခဒိန်

August 2009
S M T W T F S
« Jul   Sep »
 1
2345678
9101112131415
16171819202122
23242526272829
3031  

Enter your email address to subscribe to this blog and receive notifications of new posts by email.

Join 7 other followers

ကဗျာ.. ခင်ဇော်မြင့် ချယ်ရီ ခွဲခွါ ဂျွန် စကားပြေ စွဲစွဲလမ်းလမ်း ဆုံးရှုံးခဲ့ဘူးတယ်... ဆွတ်ပျံ့ဖွယ်အောင် ဇွန် ညီမလေး ညနေ တိတ်တခိုး တိုးနှောင်မိုး တမြေ့မြေ့ ထားခဲ့တဲ့အတိုင်း ဒီဇင်ဘာ ပန်းချီ ပိုင်မင်းဦး ပျားရည် ပျားရည်အိမ် ပွင့်ဦး ပွဲတော်ည ဘုန်းနေသွန်း ဘုန်းနေသွန်းရဲ့ ကဗျာ ဘုန်းနေသွန်းရဲ့ ကဗျာ မင်းစိုးရာ မိဆိုး မိုးတွေ ညို့နေပြီ မီမီ မျက်ရည်အိမ်ယာ ရင်ကွဲနာ လင်းဆက်နောင် လွမ်းသူ လွမ်းစေတီ လွမ်းတေး ဝဿန္တ သတိတရ သတိရခြင်းအလျား သီချင်း သီတင်းကျွတ် သုမင်းညို သူရနီ အချစ်အကြောင်း အစိမ်းသေ အမှတ်တမဲ့...နှင်း အမှတ်တမဲ့ နှင်း အလွမ်းသီချင်း အုံ့ပုန်း ဆောင်း နေ့များ မေစု မောင်ဘုန်းရဲ့ ကဗျာ အေဒင် အောင်ပိုင်စိုး အောင်ရင်ငြိမ်း ဖြူပြာပြာ ဖြူဖြူဇော် မြစ်ဆိပ် မြတ် ကြယ်လွဲမိုး နွယ်စိမ်းဝေ နှင်း